ILOILO CITY – Dal-on sang Golden State Warriors ang National Basketball Association All-Star Game sa San Francisco sa 2025.
Ang 74th All-Star Game sang liga ang natalana sa Pebrero 16, 2025.
Suno kay National Basketball Association commissioner Adam Silver, excited na sila nga dal-on ang All-Star festivities sa San Francisco Bay Area kun sa diin, makita ang malawig kag madinuagon nga history sang basketball.
Ginpasalamatan man niya ang kabilugan nga Warriors organization sa ila suporta nga madala ang NBA All-Star balik sa Bay Area.
Ini ang ikatatlo nga tion nga mangin host sang midseason exhibition ang amo nga franchise.
Una sila nga nag-host sang 1967 sang sila ang gintawag pa nga San Francisco Warriors kag ginpatigayon ini sa Daly City, California, sa Cow Palace.
Sang 2000 sang ulihi sila nga nag-host sa Oakland sang sanday Tim Duncan sang San Antonio Spurs kag Shaquille O’Neal sang Los Angeles Lakers ang ginhingadlan nga co-Most Valuable Players sang hampang.
Ang 18,000-seat Chase Center sang Warriors malapit sa San Francisco Bay ang nagbukas sang 2019 nga nagbulos sa Oracle Arena sang Oakland.
Samtang, ang 2024 All-Star Game ang hiwaton sa Pebrero 18 sa Indianapolis.
