ILOILO CITY – Ginakabig nga overlooked variable ang good ventilation sa pagtapna sang COVID-19.
Sa programa Doktor Bombo, ginpahayag ni Engr. Nilo Jardeleza, structural engineer kag academic personnel, nga nagakadapat nga ang tagsa ka building ukon edipisyo ang may yara sang maayo nga ventilation agud indi pabalik-balik ang ginahaklo nga hangin kun sa diin naga-upod ang pathogens nga nagatuga sang infection.
Suno kay Engr. Jardeleza, ginapanugyan sang mga Engineer nga sa tagsa ka building kasubong sang workplace, mas makapaayo nga may yara sang madamo nga bintana agud nga makasulod ang preska nga hangin kag makaguwa naman ang carbon dioxide nga ginapaguwa paagi sa pagginhawa.
Magluwas sa good ventilation, mas makapaayo man nga indi crowded ang ginatiniran bangud nagaguwa sa mga pagtuon nga mas madali nga maglaton ang virus kun madamo ang nagatinir sa isa lang ka lugar.
Nagakadapat man suno sa natungdan nga sundon ang minimum health protocol bilang proteksyon sa posible paglaton sang COVID-19.
