Nagpasalig ang Global tech giant nga Google nga buligan sini ang micro, small, and medium enterprises (MSMEs) sa Pilipinas para sa ila nga presensya online kag agud nga mas maka-konekta sila sa iban nga mga negosyo.
Ginpasalig man ang training sa masobra 100,000 ka kabataan kag ila ginikanan kaangot sa responsable nga paggamit sang teknolohiya.
Kadungan ini sang meeting ni President Ferdinand “Bongbong” Marcos Jr. kay Google global vice president Karan Bhatia kun sa diin iya ginpahayag nga magapadayon sila sa pagbulig sa mga magagmay nga negosyo sa digital landscape paagi sa partnership sa Department of Trade and Industry (DTI).
Una na nga ginpaguwa sang kumpaniya ang Google Career Certificates (GCC) sa virtual campuses sang DTI kun sa diin covered ang 1,300 ka Negosyo Centers sa 16 ka mga rehiyon sa Pilipinas.
Nakahatag man ini sang 40,000 ka GCC scholarships sa mga kabataan nga Pinoy, mga nagapangita sang trabaho, magagmay nga entrepreneurs, kag civil servants kaangay sa project management, cybersecurity, IT support, data analytics, UX design, kag digital marketing.
Plano man sang kumpaniya suno kay Bhatia nga pasangkaron pa ang ila nga operasyon sang negosyo sa Pilipinas halin sa 50,000 ka mga empleyado sa pungsod halin sang nagsugod ini sang 2013.
Ini nga meeting ni Marcos kag Bhatia ang kadungan sang Trilateral Leaders Summit sa Amerika kaupod kay US President Joe Biden kag Japanese Prime Minister Fumio Kishida.#
