ILOILO CITY– Ginpakigbahin ni Iloilo Governor Arthur Defensor Jr. kun ano siya nga sahi sang amay kag padre de pamilya sa iya anak, magluwas sa iya katungdanan bilang amay sang bug-os nga probinsya sang Iloilo .
Sa interview sang Bombo Radyo kay Governor Defensor pinaagi sa Good Morning Philippines Program, iya ginpahayag nga nangin madinalag-on man siya sa patag sang pagpadako sang iya naga-isahanon nga anak.
Suno kay Defensor, indi man siya istrikto nga sahi sang amay para sa iya nagaisahanon nga 25 anyos nga anak.
Pahayag pa niya, nakatapos na sang pagtuon ang iya anak kag makabig niya nga nangin madinalag-on siya sa iya rolyo bilang amay kag padre de pamilya.
Dugang pa sang gobernador, indi man gid niya masunod ang tanan nga estilo ni anay Iloilo Governor Arthur Defensor Sr, bilang isa ka amay, apang may pagka-anggid ang ila pamaagi sa pagtungod sang ila responsibilidad sa tagsa nila ka pamailya.
Samtang ginpahayag man Governor Defensor nga hugot kag tuman ang pagpasalamat niya sa iya amay nga si anay Iloilo Governor Arthud Defensor Sr, bangud sa pag-giya, kag paghatag sang mga halimbawa sa diin madamo siya sang natun-an.
Suno kay Defensor, ang tanan nga kadalag-an kag kaayuhuhan kag kun ano man ang nadangatan niya sa subong ang bangud man sa paghimakas, kag pag-agubay sang iya amay.
Nagapasalamat siya suno kay Defensor, sa anay gobernador bangud bilang isa ka anak nga sa subong nagaserbe bilang amay sang probinsya. madamo siya sang natun-an sa patag sang panghimanwa.
Pahayag pa niya, isa sa iya natun-an sa iya amay amo ang pagdumala pinaagi sa pagtrabaho kag kag pagserbe sa tagsa ka mga pumuluyo.
Bangud politiko ang ila pamilya suno sa gobernador, naintindihan man niya sadto kun ngaa indi sa tanan nga oras, indi nila kaupod ang ila amay kag wala sila nakabatyag nga nagsunggod sila sa anay gobernador.
Ginpakigbahin man niya nga kaangay sang iban pa nga mga bata, gina-akigan man sila sang una apang wala sang ni isa ka beses nga ginpatup-an sila pisikal sang ila amay.
Sa subong suno sa natungdan, indi matakos ang ila pagpasalamat sa anay gobernador, kag nagapangayo man siya sang padayun nga suporta sini, agud mas mangin maayo pagid ang iya pagpanerbisyo sa pumuluyo sang probinsya.
