ILOILO – Indi pabor si Iloilo Governor Arthur Defensor Jr. sa proposal ni Chief Presidential Legal Counsel Atty. Salvador Panelo nga dumilian ang riding-in-tandem ukon pag-angkas sa motorsiklo.
Sa interview sang Bombo Radyo kay Defensor, iya ginpahayag nga nagakadapat kuntani nga ginpanumdom anay ni Panelo kun ano ang benepisyo nga mahatag sang nasambit nga proposal.
Suno kay Defensor, mahimo nga may yara sang iban pa nga solusyon agud matapna ang mga riding-in-tandem incidents magluwas sa pagdumili sa pag-angkas sa motorsiklo.
Ginpahayag sang gobernador nga nagapanguna nga ‘mode of transportation’ ang habal-habal ilabi na sa mga banwa sa diin mabudlay ang pagsulod sang mga salakyan.
Gin-athag man ni Defensor nga naintindihan niya ang luyag nga ipunto ni Panelo.
Apang mas maayo suno sa natungdan nga konsultahon anay ang mga peace and order agencies kaangay sang Philippine National Police (PNP) bangud sila ang mas nakaintindi sa pagtapna sang krimen kaangay sang riding-in-tandem incidents.
