Ginaabi-abi ni Iloilo Governor Arthur Defensor Jr. ang ginaduso nga development sang Pax Silica initiative sa Pilipinas nga suno sa iya, makabulig agud makalagas ang probinsya sa madasig nga pag-uswag sang artificial intelligence, drone technology, 3D printing kag iban pa nga industriya nga nakasentro sa teknolohiya.
Suno kay Defensor, importante ang amo nga inisyatibo sa katuyuan sang provincial government nga mapasanyog pa ang ikasarang sang mga kabataan kag mahanda sila sa mga trabaho nga may kaangtanan sa semiconductor kag technology sectors.
Pahayag sang gobernador, kinahanglan nga maanad kag mahatagan sang bastante nga oportunidad ang mga kabataan agud mangin kabahin sang mga bag-o nga industriya nga ginalauman nga magabukas sang mas madamo nga trabaho sa palaabuton.
Dugang niya, dako nga bentaha man para sa Iloilo ang pag-angkon sang international airport, partikular sa mga industriya nga nagakinahanglan sang madasig nga transportasyon sang mga high-value kag technology-related products paagi sa air cargo.
Samtang, ginsiling ni Defensor nga nagahulag man ang provincial government agud matukod ang isa ka growth center nga mahimo nga mangi lugar para sa light industries kag magaserbe nga mekanismo agud maengganyo ang mga kompanya nga mag-invest kag magtukod sang operasyon sa Iloilo, sa baylo nga dal-on ang ila nga negosyo sa Luzon.
Suno sa iya, parte man sang plano sang provincial government ang pagpabaskog sa technology education program paagi sa bulig sang Technical Education and Skills Development Authority ukon TESDA, Department of Education ukon DepEd, Department of Science and Technology ukon DOST, kag provincial government.
Sa idalom sang plano nga partnership, magahatag ang DOST sang mga kinahanglanon nga gamit para sa techno hub sang probinsya, samtang ang TESDA naman ang manguna sa pagpatuman sang programa kag paghanas.
Para kay Defensor, importante nga indi mabayaan ang Iloilo sa madasig nga pagbag-o sa technology sector.
