ILOILO CITY- Ginaabi- abi ni Iloilo Governor Arthur Defensor Jr. ang extension sang Enhanced Community Quarantine (ECQ) status sa Iloilo Province tubtob sa Agusto 7,2021.
Sa interview sang Bombo Radyo kay Governor Defensor, iya ginpahayag nga wala man ini sang plano nga i- apela pa sa National Inter-Agency Task Force for the Management of Emerging Infectious Diseases ang quarantine status sang probinsya.
Suno sa iya, wala man gid sang dako nga adjustment nga ginhimo ang probinsya sang una ini ginpaidalom sa ECQ gikan sa Modified Enhanced Community Quarantine (MECQ).
Pahayag niya, tutukan nalang subong sang probinsya ang pagbulig sa mga apektado nga pumuluyo.
Ginakabig naman niya nga isa ka maayo nga senyales ang indi na pagtimbuok sang kaso sang COVID-19 sa probinsya kag nagalaum ang opisyal nga mas mapanubo pa ang numero sang infection.
