ILOILO – Ginkalipay ni Iloilo Gov. Arthur “Toto” Defensor Jr. ang pagpabor sang Sanguniang Panlalawigan nga painan sang P100 million nga pondo ang mga mangunguma sa probinsya sang Iloilo.
Sa interview sang Bombo Radyo kay Defensor, iya ginpahayag nga ang nasambit nga kantidad ang halin sa supplemental budget ang igahatag sa mga mangunguma nga apektado sang Rice Tariffication Law.
Suno kay Defensor, nagahimo man sang lihok ang provincial government agud nga makabulig sa mga magagmay nga mga asosasyon paagi sa paghatag sang loan.
Ginpahayag ni Defensor nga ang 13 ka mga asosasyon nga una nga nakapasa sang kumpleto nga dokumento ang may yara sang maayo nga track record.
Sa P100 million suno sa gobernador, may yara pa sang nabilin nga kantidad kag ini ang bukas para sa mga asosasyon ukon kooperatiba nga maluyag pa nga mag-apply sang loan assistance.
Ang nasambit nga pondo suno sa natungdan ang isa ka palay-buying budget sa diin mismo ang asosasyon ang magabakal sang palay sang mga mangunguma kag sila man ang magapangita sang paagi agud nga makaginansya kag mabalik ang kwarta sang provincial government.
