ILOILO CITY – Indi makahatag sang performance rating si Iloilo Governor Arthur Defensor Jr., kay President Ferdinand “Bongbong” Marcos, Jr. bangud isa pa lang ka tuig ini nga nagapungko bilang presidente sang Pilipinas.
Sa interview sang Bombo Radyo kay Governor Defensor, iya ginpahayag nga humalin sang una, wala na siya nagahatag sang rating ukon grado sa isa ka chief executive.
Suno sa gobernador, isa pa lang ka tuig si Marcos sa pagpangalagad apang ginakalipay niya nga nalakip sa top priorities sang iya administrasyon ang mga proyekto para sa Iloilo.
Kun matandaan, nalakip sa high-impact infrastructure flagship projects ni Marcos ang Iloilo-Capiz- Aklan Expressway nga mangin isa ka full-access controlled toll expressway nga may four lanes nga ginalakipan sang elevated roadways, viaducts, tunnel kag long-span bridge.
Nalakip man sa una nga State of the Nation Address ni Marcos ang revival sang Panay Railways nga nagatanyag sang mas barato nga pamaagi sa pag-transport sang goods kag pasahero.
Nahibaluan nga magatambong personal si Defensor sa State of the Nation Address ni Marcos sa Hulyo 24.
