ILOILO – Iga-validate ni Iloilo Governor Arthur Defensor Jr. kun bala may mga Korean nationals nga nakasulod sa Iloilo nga naghalin mismo sa Daegu City sa South Corea sa diin apektado sang Coronavirus Disease 2019.
Ini matapos nga ginkansela sang Iloilo Provincial Government kag Iloilo City Government ang RUN for Jesus 2020 event nga patigayunon kuntani subong nga adlaw sa La Paz Football field bangud ang mga event coordinators kag pastor nga nagikan mismo sa Daegu City.
Sa interview sang Bombo Radyo kay Gov. Defensor, iya ginpahayag nga tsekyaron niya sa bulig man sang City Government kun bala may may yara sang Korean nationals nga nagapabilin subong sa mga hotel sa syudad.
Suno kay Defensor, pormal na nga ginpatuman ang Executive Order 028-A sa diin nasaad ang dugang nga quarantine kag preventive measures nga pagahimuon.
Ang South Korea pahayag sang gobernador ang yara sa subong sa kaangay nga kategorya kaupod ang China, HongKong kag Macau sa diin gina-ban ang ila nga pagsulod sa Pilipinas.
May yara man sang impormasyon nga nabaton si Gov. Defensor nga may mga Korean nationals nga magatambong kuntani sa nasambit nga kahiwatan nga yara subong nagapabilin sa Aklan apang ini pa ang i-validate sang gobernador.
