ILOILO – Nakigsapol si Iloilo Governor Arthur Defensor Jr. sa onse ka mga alkalde sang mga munisipalidad sa quinto distrito sang probinsiya agud mapabaskog ang mga lihok batok sa illegal fishing sa Visayan Sea.
Ang pagsinapol ang ginhimo kahapon, Nobyembre 14, sa Ajuy, Iloilo.
Sa interview sang Bombo Radyo kay Defensor, iya ginpahayag nga ang ila pag-istoryahanay ang nagatuyo nga mangin ‘coordinated’ ang ila mga tikang sa pagpauswag sang coastal resource management sa Northern Iloilo.
Indi lamang illegal fishing ang dapat tapnaon suno kay Defensor, kundi dapat nga lantawon ang bilog nga estado sang kalalawran kag dapat hibaluon kon ano ang dapat tutukan.
Dugang ni Defensor, nangin daku ang bulig sang mga polisiya nga gin-implementar sang nagligad nga mga bulan bangud kon lantawon ang mga lugar kon diin ‘ginpapahuway anay ang dagat’, mas madamo na ang isda nga makit-an santo sa report sang Bureau of Fisheries and Aquatic Resources (BFAR).
Ginalantaw man ni Defensor nga posibilidad ang pagpasar sang executive order agud mapasangkad pa ang ‘personality’ sang Northern Iloilo Alliance for Coastal Resource Management, isa ka non-stop kag non-profit corporation nga ginabug-usan sang mga munisipalidad sa quinto distrito, kag ila pa mabuligan pa ang kalalawran.
Iya ginpahayag nga ang coastal resource management sa Northern Iloilo ang responsibildad sang madamo nga tawo, lakip na ang Provincial Government, maritime unit, civil society organization, kag iban pa.
May patigayunon pa nga dugang nga pagsinapol agud masigurado ang ‘coordinated effort’ kag ‘integrated plans’ suno kay Defensor.
