ILOILO – Indi apektado sang African Swine Fever (ASF) ang mga nagasulod nga buhi nga baboy kag nakaproseso nga mga produkto sini sa probinsya sang Iloilo.
Ini ang ginkumpirma kag ginkalipay ni Iloilo Governor Arthur Defensor Jr.
Sa interview sang Bombo Radyo kay Defensor, iya ginpahayag nga padayon gihapon ang monitoring sang Iloilo Provincial Government, sa bulig sang taskforce nga nagasekyar sang nasambit nga kaso, sa mga produkto sang baboy nga ginapasulod sa probinsya.
Suno kay Defensor, sugod sang may mga pag-amyendar nga ginhimo sa Executive Order (EO) 159A, wala sang narekord nga positibo nga kaso kag nagalaum siya nga mapabilin ini nga hilway sa ASF ang Iloilo.
Nahibaluan nga base sa EO 159A, temporaryo nga banned ang tanan nga meat products nagikan sa bilog nga Luzon.
Ini ang kabahin sang “pagdugang sang kudal” sang probinsya agud masigurado ang proteksyon, ilabi na nga sang Oktubre, may mga kaso na sang swine fever sa Pangasinan, Cavite, Nueva Ecija, kag Quezon.
