𝗜𝗟𝗢𝗜𝗟𝗢 — Nagaguwa ang pangalan ni Iloilo Governor Arthur Defensor Jr., sa ginaduso nga mangin Chairman sang Regional Development Council 6.
Ini bangud mabakante ang nasambit nga posisyon nga ginapungkuan ni Bacolod City Mayor Alfredo Benitez sa tion nga mangin functional na ang Negros Island Region matapos nga ginpirmahan na ni Presidente Ferdinand Marcos Jr. ang Republic Act 12000 nga nagatukod sang mga probinsya sang Negros Occidental, Negros Oriental kag Siquijor Island sa isa ka Administrative Region ukon ang ginatawag nga ‘Negros Island Region.’
Sa interview sang Bombo Radyo kay Governor Defensor, iya gina-abi abi ang pagduso sa iya ni Iloilo City Mayor Jerry Treñas nga mangin chairman sang RDC 6 kag indi niya ini pagbalibaran.
Apang suno sa gobernador, nakadepende ini sa gihapon sa bug-os nga Regional Development Council bangud indi ini appointed sa baylo, ginabotohan ang sin-o man para sa amo nga posisyon.
Dugang pa sang natungdan, wala man ini sang may naatrasan sa ano man nga mangin pagpanghangkat kag trabaho para sa publiko.
