ILOILO CITY-Nagaayo si Iloilo Governor Arthur Defensor Jr. sa mga shipping lines nga indi pagpasobrahan sa 150 nga quota ang numero sang mga Locally Stranded Individuals nga ginapapauli sa Iloilo kada semana.
Sa interview sang Bombo Radyo kay Governor Defensor, iya ginpahayag nga kuntani indi magpinagusto ang mga shipping lines sa pagbaligya sang tickets sang mga pasahero agud masunod ang quota.
Suno kay Defensor, katuyuan sini nga indi magginutok ang mga LSIs sa mga quarantine facilities sa kabanwahanan sa Iloilo kg indi man matam-an ang mga frontliners.
Gin-athag naman sang gobernador nga wala sang moratorium ang Iloilo angot sa pagpapauli sa mga LSIS.
Gin-ako sang gobernador nga mangin siya ang natingala man bangud may mga pasahero nga nagareklamo nga indi sila pagpasakyon sa mga barko bangud may moratorium nga ginapatuman ang probinsya.
May kaangtanan naman sa stranded nga mga taga-Iloilo sa pier sa Manila, ginpahayag sang natungdan nga makapakig-angot ini sa shipping line agud mapapauli na ang mga ini.
