ILOILO – Nagahingyo si Iloilo Gov. Arthur ‘Toto’ Defensor Jr. sang bulig sang pumuluyo agud nga matapna ang balati-an nga Dengue.
Ini ang kasunod sang pagdeklarar sang gobernador nga ipaidalom sa Dengue Outbreak ang probinsya sang Iloilo bangud sa mataas nga kaso sang nasambit nga balati-an.
Sa interview sang Bombo Radyo kay Gov. Defensor, iya ginpahayag nga nagpaguwa na siya sang Executive Order 016 bilang pagpahibalo sa publiko kun ano kalala ang problema kun Dengue ang pagahambalan.
Suno kay Defensor ang iya nga pagpaguwa sang Executive Order ang lain sa deklarasyon sang kamalidad sang Sanguniang Panlalawigan agud nga ipaidalom sa Dengue Outbeak ang probinsya sang Iloilo.
Ginamandu-an man ang tagsa ka district hopsital nga maghatag sang libre nga serbisyo para sa mga Dengue Fever patients.
Buwas nga adlaw sang Sabado, ginpahayag ni Defensor nga maga-umpisa na ang ‘Do Day kontra Dengue Drive’ sa tagsa ka mga barangay.
Ang nasambit nga lihok ang patigayunon na sa tagsa ka Sabado agud nga matapna ang pagduging sang mga lamok nga nagadala sang balati-an.
Sa subong, ginpahayag sang gobernador nga magahatag ang provincial government sang ayuda sa mga pasyente sang Dengue.
Magluwas diri, nagbakal naman ang Iloilo Provincial Government sang mga bulong, diagnostic kit kag mga folding bed para sa mga nagadamu nga pasyente sa tagsa ka district hospital.
Santo sa pinaka-ulihi nga datus, nagalab-ot sa 3,897 ang kaso sang Dengue sa probinsya sang Iloilo kag 18 na ang patay.
