Nagalaom si Iloilo Governor Arthur Defensor Jr. nga masolusyunan na ang indi pag-intindihanay sang mga matag-as nga pinuno ang ruling party nga Partido Demokratiko Pilipino–Lakas ng Bayan (PDP–Laban).
Nahibaluan nga si Defensor ang Provincial Chairman sang PDP–Laban sa Iloilo.
Sa interview sang Bombo Radyo kay Defensor, iya ginpahayag nga sa Hulyo 17, magapatigayon ang ila partido sang national convention sa diin naghingyo ang gobernador nga magtambong lamang siya via online.
Suno kay Defensor, katuyuan sini nga mahusayan kun sin-o ang magpadalagan sa pagka-presidente sa idalom sang partido.
Apang nagapati ang gobernador nga kuntani parehos sang una, ihatag na lamang sa presidente sang pungsod ang otoridad sa pag-appoint kun sin-o ang mapadalagan sa pagkapresidente sa idalom sang ila partido.
Matandaan nga ginsipa sang PDP-Laban sanday Department of Energy Sec. Alfonso Cusi, vice chairman ang partido, deputy secretary-general, Melvin Matibag, kag membership committee head Astra Naik bangud sa ginapahayag paglapas sa pila ka mga probisyon sa konstitusyon sang grupo.
Santu sa PDP-Laban Resolution No. 6 nga napetsahan sang Hunyo 12, 2021, nasaad nga ginamanipula ni Cusi ang partido nga suportahan ang Duterte-Duterte tandem sa diin ginabuyagyag ang pagsuporta kay Davao City Mayor Sara Duterte-Carpio sa pagka-presidente apisar nga indi man ini myembro sang partido.
