𝗜𝗟𝗢𝗜𝗟𝗢 —Imbitado si Iloilo Governor Arthur “Toto” Defensor, Jr. sang administrasyon agud nga magtambong sa State of the Nation Address (SONA) ni President Ferdinand Marcos Jr. sa Hulyo 22, 2024, sa Batasang Pambansa sa Quezon City.
Sa interview sang Bombo Radyo kay Gov. Defensor, iya ginpahayag nga nagalaum ini nga liwat nga masambitan ni Marcos ang Iloilo sa iya nga speech agud mahatagan sa panibag-o nga mga proyekto.
Suno kay Defensor, ginaekspektar niya nga malakip ang Iloilo sa mga plano ni Marcos sa palaabuton bangud sang nagligad nga SONA anay na nga nasambit sang presidente ang probinsya.
Ginalauman man sini nga mahatagan sang exposure ang Capiz-Iloilo-Aklan Expressway kag ang mga taytay sa probinsya bangud lakip ini sa development project sang Marcos Administration.
Dako naman ang pagpasalamat sang gobernador sa presidente bangud isa ang Iloilo sa gin-prioritize sang gobyerno nga mahatagan sang mga proyekto.
