ILOILO CITY- Liwat nga nagpangabay ang Iloilo Provincial Government sa mga pumuluyo nga agwantahon anay ang mas hugot nga mga pagsulundan sa tunga sang nagataas nga kaso sang COVID-19 kag ang nadetect nga delta variant.
Sa interview sang Bombo Radyo kay Iloilo Governor Arthur Defensor Jr., iya ginpahayag nga sa subong, yara sa mataas nga lebel sang pagpatuman sang quarantine measures ang probinsya samtang napaidalom ini sa Modified Enhanced Community Quarantine.
Suno kay Defensor, labi nga ginatutukan man amo ang mga banwa nga nakarecord sang iban nga variant sang COVID-19 nga amo ang Sta Barbara, Guimbal, Zarraga, Dingle, Janiuay, Pavia, San Miguel, Oton kag Alimodian kon sa diin na- detect ang delta variant; Pavia, Alimodian kag Oton kon sa diin na-detect ang alpha variant; kag Ajuy, Tigbauan, kag Pavia nga may narecord nga beta variant.
Dugang man ni Defensor nga magabulig ang probinsya sa pag- expand sang numero sang mga ospital nga may ikasarang nga magbulong sa severe ukon critical COVID-19 cases.
Magluwas sa Iloilo Provincial Hospital nga natalana nga magbukas sang labing-una nga critical care unit sa probinsya antes magtakop ang Agusto, buligan man sang probinsya ang health department nga makasugod sang critical care programs sa Western Visayas Sanitarium sa Sta. Barbara kag Don Jose S. Monfort Medical Center Extension Hospital sa Barotac Nuevo.
Una na na-invest ang probinsya sang pag-hire sang medical staff kag dugang nga beds agud mapataas pa ang COVID-19 bed capacity sang provincial kag district hospitals halin sa 50% pasaka sa 70%.
