ILOILO – Ginpirmahan na ni Iloilo Governor Arthur ‘Toto’ Defensor Jr. ang executive order nga nagamandu sa pagdumili sa pagbaton sang live hog, karne kag processed meat gikan sa mga lugar nga may African Swine Fever.
Sa interview sang Bombo Radyo kay Governor Defensor, iya ginpahayag nga ang executive order 159 ang isa ka pamaagi agud nga matapna ang paglapta sang nasambit nga balati-an.
Suno kay Defensor, may yara naman sang gintukod nga Task Force on African Swine Fever kag Quarantine Team nga magabulig sa pagbantay sa mga ginapasulod nga supply sa probinsya sang Iloilo.
Ang nasambit nga task force kag team ang ginabug-usan sang mga empleyado gikan sa Provincial Veterinary Office kag Bureau of Animal Industry.
Liwat naman nga nagpahandumdom ang gobernador nga padayon ang monitoring sa mga live hog, karne kag processed meat nga gina-supply sa probinsya.
Mahimo lang nga tugutan ang pag-transport sang baboy kun ini ang kompleto sa mga dokumento kag permit nga ginahingyo sang Bureau of Animal Industry.
Ginpasigurado man sang gobernador nga wala sang dapat kahangaw-an ang pumuluyo bangud bastante ang supply sang baboy sa Iloilo.
Samtang, suno naman kay Dr. John Roel Hilario, Officer-in-charge sang Regional Veterinary Quarantine Office sang Bureau of Animal Industry 6, nagpapanaog man sang memorandum ang talatapan kaupod ang Department of Agriculture nga nagamando nga i-regulate ang supply sang baboy sa Western Visayas.
Ginpahayag ni Hilario nga ang nasambit nga memorandum ang nagasanto sa Executive Order 159 nga gginpaguwa ni Governor Defensor.
Dugang pa sang natungdan, padayon ang monitoring sang ahensya sa African Swine Fever kag naka stand by naman ang mga Veterinary Quarantine Officers sa mga paluparan kag sea ports agud magpatigayon sang inspection.
Suno kay Hilario, indi tanan nga sea ports ang may yara sang napahamtang nga Veterinary Quarantine Officers apang sa bulig sang Executive Order 159 ni Governor Defensor, nakapakig-angot na sila sa Local Government Units nga amo ang magapatigayon sang inspection sa mga pantalan.
