ILOILO – Mahimo na nga makapauli sa Iloilo ang mga repatriated Overseas Filipino Workers kag Locally Stranded Individuals apang limitado lamang ang numero sa tagsa ka byahe.
Ini ang nasaad sa Executive Order No. 128-H nga ginpirmahan ni Iloilo Gov. Arthur Defensor, Jr. subong nga adlaw, Hulyo 23.
Sa interview sang Bombo Radyo kay Defensor, iya ginpahayag nga nakasaad sa Executive Order nga 300 ka pasahero lang kada semana ang pahanugutan sa mga flights kag 250 ka pasahero kada semana naman ang pahanugutan nga makasakay sa barko.
Sa barko, 200 ka pasahero kada semana ang magahalin sa Luzon kag 50 naman ka pasahero ang magahalin sa Mindanao.
Mandatory man ang pagpaidalom sa Reverse Transcription Polymerase Chain Reaction (RT-PCR) test ang returning residents antes ang ila byahe pabalik sa Iloilo kag kinahanglan man nila nga magpaidalom sa 14-day quarantine sa municipal facility kag kun sa commercial ukon tourism accommodation establishment naman, ang Overseas Filipino Worker ukon ang Locally Stranded Individual na ang magagasto.
Kinahanglanon man ang medical certificate halin sa sending Local Government Unit kag travel authority halin sa chief of police ukon higher command kag dapat indi pagkalimtan ang pagpakig-angot sa Local Government Unit nga pauli-an.
Mahimo man nga makahatag sang travel authority ang gobernador apang kinahanglan nga may yara sang koordinasyon sa Philippine National Police.
Ang mga airlines kag shipping companies ang kinahanglan nga maghatag sang passenger manifest sa sulod sang 24 oras antes ang flight ukon byahe kag ang mga residente lang sang probinsya kag syudad sang Iloilo ang akomodaron.
Nakasaad man sa Executive Order nga separado ang chartered flights sang mga Overseas Filipino Workers sa flight sang Locally Stranded Individuals.
