ILOILO CITY- Nanindugan si Iloilo Governor Arthur Defensor Jr. nga indi niya pagtugutan nga mag-operate ang Philippine Offshore Gaming Operators (POGO) sa probinsya.
Sa interview sang Bombo Radyo kay Defensor, iya ginpahayag nga magluwas nga illegal ini, wala man ini sang ihatag nga trabaho sa mga pumuluyo.
Ginpat-ud man sang gobernador nga wala sang POGO sa probinsya kag wala man sang may nagtanyag sa iya para sa pagpatindog sang kaangay nga pasilidad.
Suno kay Defensor, kaupod niya ang kapulisan agud masiguro nga indi makalusot ang kasubong nga illegal nga aktibidad sa probinsya.
Dugang niya, kontento na ini subong sa mga industriya nga nagabuhi sang ekonomiya kaangay sang Business Process Outsourcing Companies bangud legal ini kag nagahatag sang madamo nga trabaho sa mga Ilonggo.
