πππππ‘π’π, πππ’πππ’ βPersonal nga ginpasalamatan ni Iloilo Governor Arthur “Toto” Defensor, Jr. si Presidente Ferdinand Marcos, Jr. kaangot sa pag-ingurar sa Jalaur River Multipurpose Project Phase 2 sa Calinog, Iloilo, subong nga adlaw.
Sa interview sang Bombo Radyo kay Defensor, iya ginpahayag nga ang inagurasyon ang isa ka tumalagsahon nga hitabo sa Iloilo kag sa Western Visayas ilabi na nga nagtambong ang president sang Pilipibas.
Suno kay Defensor, dako gid ang iya pagpasalamat sa presidente bangud isa ang Iloilo sa gina-prioredad sang administrasyon ilabi na sa infrastructure projects.
Nagpabutyag man sang pagpasalamat ang gobernador sa gobyerno sang South Korea nga isa sa nagbulig agud nga matigayon nga masugodan ang phase 2 sang proyekto.
Lakip man sa ginpasalamatan ni Defensor si Sen. Franklin Drilon bangud sa 15 ka tuig nga pagpakigbato sa kamara agud nga matigayon nga mahuman ang Jalaur River Multipurpose Project Phase 2.
Ginalantaw man sang natungdan nga nga mangin palaagyan ang dam agud nga mangin major contributor sang pagkaon kag mangin number 1 rice producer ang Iloilo sa Pilipinas sa bulig sang amo nga proyekto.
Nagapati naman si President Ferdinand Marcos, Jr. nga ang proyekto ang makapasangkad sang agrikultura sa bilog nga rehiyon ilabi na sa mga mangunguma nga mga Ilonggo.
Suno kay Marcos kinahanglan nga mapadasig-dasig ang pagtrabaho sa phase 2 sang dam rason man nga nagpanawagan ini sa publiko nga magkoordinar sa pagpasad sang ginakabig nga isa sa pinakadako nga proyekto sang adminitrasyon saguwa sang Metro Manila.
Nahibaluan nga ang P19.7-billion infrastructure development project ang magapataas sang rice production kag makahatag benepisyo sa 25,000 ka mga mangunguma kag 4,500 ka mga myembro sang indigenous communities sa probinsya sang Iloilo.
