ILOILO – Nagaplano ang Iloilo Provincial Government sa pagpatigayon sang ‘Limpyo Iloilo’ sa Enero sa masunod nga tuig.
Ini ang isa ka adlaw nga convergence program sa diin magatingob ang tanan nga national government agencies kag Local Government Units (LGUs) sa probinsya sang Iloilo agud bug-usan ang pagpaninlo sa mga dalanon kag mga coastal areas.
Suno kay Iloilo Governor Arthur Defensor Jr., pauswagon man ang solid waste management program sa probinsya, kag ikonrol ang paggamit sang plastic.
Suno sa gobernador, sang Hwebes sang nagligad nga semana, nakigsapol siya sa Department of Public Works and Highways (DPWH) kag sa lima pa ka district engineers agud hambalan ang mas agresibo nga pagpanglimpyo sa probinsya.
Ginhingyo sang gobernador sa publiko nga bululigan ang pagpulot sang basura sa tagsa ka mga area bangud nagapati siya nga lain ang itsura sang probinsya sa tion nga mas matinlo ini.
Kadungan sini, nagpanawagan man si Defensor nga halungan ang mga proyekto sa Iloilo Provincial Grounds nga ginpaidalom man sa inauguration sang nagligad nga Lunes, Disyembre 2.
Nahibaluan nga una naman ini nga ginpanawagan ni anay Iloilo Governor Arthur Defensor Sr. sa iya emosyonal nga speech sa amo nga kahiwatan.
