ILOILO – Wala ginlauman ni Iloilo Governor Arthur Defensor Sr. nga tuman ka daku ang abanse sang iya anak nga si Iloilo 3rd District Cong. Arthur Defensor Jr. batok kay Iloilo 4th District Cong. Ferjenel Biron sa pagka-gobernador sa probinsya sang Iloilo.
Sa interview sang Bombo Radyo kay Gov. Defensor, iya ginpahayag nga ginalauman na niya nga magadaug ang iya anak nga si Cong. Toto sa pagka gobernador apang wala niya ginlauman nga tuman ka daku ang mangin abanse.
Tuman ang pagpasalamat sang gobernador sa mga nagsakdag sa kandidatura sang iya anak.
Ginpahayag ni Gov. Defensor nga sa pihak sang mga pagpakamalaot nga ila nabaton nga mag-amay gikan sa mga kasumpong sa pulitika, nagapabilin sa gihapon ang pagsalig sang mga pumuluyo sa ila.
