ILOILO – Wala pa subong sang pinal nga pangalan nga posible maka-tandem ni Iloilo Governor Arthur Defensor Jr., sa May 12, 2025 elections.
Sa interview sang Bombo Radyo kay Iloilo 2nd District Rep. Michael Gorriceta, iya ginpahayag nga posible nga patapuson anay ang State of the Nation Address (SONA) ni President Ferdinand R. Marcos Jr. antes istoryahan sang mga local nga kandidato kun sin-o gid ang mangin bise gobernador ni Defensor sa masunod nga piniliay.
Nahibaluan nga si Gorriceta ang isa sa mga nagagwa nga pangalan nga ginapilian nga magpadalagan bilang bise gobernador.
Suno kay Gorriceta, dako man ang posibilidad nga wala sang ideklarar si Defensor nga running mate.
Samtang sa pagka-gobernador naman, ginpahayag sang kongresista nga posible nga wala sang may mabunggo kay Defensor sa iya ulihi nga termino.
Ini bangud mabudlay na kag kulang na ang tyempo sang isa ka politiko nga mag-establish sang iya pangalan agud magbunggo kay Defensor.
Nahibaluan nga si Defensor amo subong ang nagapungko bilang regional chairman sang Partido Federal ng Pilipinas (PFP) nga amo man ang partido sang presidente.
