ILOILO CITY- Nanindugan si Iloilo Governor Arthur Defensor Jr. nga wala ini sang bag-uhon sa Executive Order No. 200 series of 2021 nga naga-detalye sang MECQ guidelines sa probinsya.
Ini sa pihak sang pagsita sang Department of Interior and Local Government bangud sa indi pagtuman sa Omnibus Guidelines on the Implementation of Community Quarantine in the Philippines nga ginpagwa sang Inter-Agency Task Force for the Management of Emerging Infectious Diseases.
Sa interview sang Bombo Radyo kay Defensor, iya ginpahayag nga sa nasambit nga EO, nangin basehan niya ang Department of Trade and Industry (DTI) Memorandum Circular 21-15 nga gin-isyu sang Abril 30, 2021.
Suno kay Defensor, isa ka specialized agency ang DTI nga nagasentro sa trade and commerce gani indi basta-basta mabalewala ang amo nga memorandum circular.
Dugang pa sang gobernador, pirmado sang secretary sang DTI ang amo nga memorandum gani kaangay lang nga presidente man ang nagpirma sini kag wala sang rason nga bawion ukon bag-uhon niya ang guidelines sa E.O.
Matandaan nga nagpadala sang sulat ang DILG kay Defensor angot sa indi pagsunod sa Omnibus Guidelines apang suno sa natungdan, naistorya na niya kag napaathagan si DILG-Region 6 Director Juan Jovian Ingeniero tuhoy diri.
Gin-athag naman ni Defensor nga ang MECQ guidelines sa iya EO ang resulta sang pagharmonize niya sang Omnibus Guidelines sang IATF kag DTI Memorandum Circular.
Nahibaluan nga ginatugutan sa probinsya ang indoor dine-in services commissaries, restaurants, kag eateries kag ang pag-operate sang mga beauty salons apisar nga hugot nga ginadumilian ini sa mga lugar nga yara sa MECQ status.
