Personal nga nagpadulong si Governor Arthur “Toto” Defensor Jr. sa Bureau of Jail Management and Penology (BJMP) District Jail sa Barangay Nanga, Pototan, Iloilo agud magpatigayon sang gift-giving activity kag groundbreaking ceremony para sa pagpatukod sang ginaplano nga covered gym sa sulod sang jail facility para sa mga Persons Deprived of Liberty (PDL).
Gin-updan ini sang mga opisyal sang BJMP nga ginpangunahan ni Jail Chief Inspector Atty. Mark Malhabour, nga amo man ang jail warden sang pasilidad.
Bilang kabahin sang programa, nagkanta man si Jail Warden Malabor sang Christmas song para sa mga PDL.
Sa interview naman sang Bombo Radyo kay Gov. Defensor, ginpahayag niya nga kabahin sa mga ginaplano nga proyekto sa sulod sang jail facility amo ang pagbutang sang daku nga water tank para masiguro ang nagaka-igo nga suplay sang tubig.
Dugang pa diri, ila man ginaplanuhan ang pagpalapad sang sports activities kag iban pa nga programa kag proyekto para sa kaayuhan sang mga PDL sa probinsya sang Iloilo.
Ginhatagan man sang mga pangunahon nga kinahanglanon ang mga PDL bilang kabahin sang Christmas celebration kag bilang pagpakita sang pag-atipan kag paghatag paglaum sa ila bisan yara sila sa sulod sang pasilidad.
Ginpasalamatan naman sang BJMP District Jail Nanga ang provincial government sa padayon nga suporta, nga suno sa ila daku nga bulig sa rehabilitasyon, kaayuhan, kag moral sang mga PDL ilabi na subong nga panahon sang Paskwa.
