Halimbawa, naga-selfie ka malapit sa dam, tapos nahulog ang imo nga cellphone, ano ang imo himuon? Pabay-an na lang kag mabakal sang bag-o, ukon pahubson mo ang dam agud makuha ini?
Indi ina imposible bangud isa ka opisyal sa India ang nagpili nga pahubson matuod sang dam agud lang nga makuha ang iya cellphone nga nahulog samtang naga-picture picture!
Ang malain ugaling — bangud ini nga opisyal nagapangatubang na sang suspensyon.
Ginkilala ang lalaki kay Rajesh Vishwas, isa ka food inspector.
Natabo ini sang yara siya sa Kherkatta Dam nga nahamtang sa central Indian state sang Chhattisgarh.
Sang nahulog ang iya nga cellphone, may local divers nga nagbulig agud ma-retrieve apang wala nakuha.
Ini ang rason kun ngaa nagbayad si Vishwas sang duha ka diesel pumps agud nga makuhaan sang tubig ang amo nga dam.
Tatlo ka adlaw ang pag-drain sang dam agud nga makuha ang ginabanta two million liters sang tubig nga bastante agud maka-irrigate sang 600 ka ektarya sang talamnan.
Sa iya statement, ginpaathag ni Vishwas nga nagaunod sang importante nga government data ang iya phone kag may pahanugot man halin sa sub-divisional officer nga i-drain ang amo nga dam.
Sang nakuha na ugaling ang iya nga cellphone, puno na ini sang tubig kag indi na mag-andar.
Gin-suspend si Vishwas sang isa ka opisyal halin sa water source department samtang nga padayon naman ang inquiry.
“He has been suspended until an inquiry. Water is an essential resource and it cannot be wasted like this,” suno kay Priyanka Shukla, isa ka Kanker district official.
Todo naman ang panginwala ni Vishwas nga gingamit sini ang iya nga posisyon sa gobyerno agud imandu ang pag-drain sang tubig. Ginrason sini nga ang tubig nga iya ginpaguwa ang makabig naman nga surplus ukon sobra, kag indi naman magamit. #
