𝗜𝗟𝗢𝗜𝗟𝗢 — Ginarespeto ni Iloilo Governor Arthur Defensor, Jr. ang nangin desisyon ni Vice President Sara Duterte nga pag-resign bilang tiglikom sang Department of Education (DEPED).
Sa interview sang Bombo Radyo kay Defensor, iya ginpahayag nga apisar nga wala sini mahibaluan ang rason ni Duterte, magapabilin sa gihapon ini nga bise-presidente sang pungsod apisar man kun lain ang luyag sini nga mangin trabaho.
Suno kay Defensor, may yara sila sang good working relationship sang vice president kag sang nasambit nga ahensya, sa diin, nangin parte sila sang Bulig Eskwela Program sang Iloilo.
Ginpahayag man sini nga bangud sa bulig sang Department of Education, nalab-ot sang probinsya ang pagpatuman sang informative educational system, kaangay na lamang sa voter’s education nga labing-kinahanglan sang mga kabataan.
Paagi man sa ahensya, ginpasar ni Defensor ang Republic Act 11206 ukon ang Carreer Guidance and Counseling Act para sa secondary schools sa bug-os nga Pilipinas.
Nangin palaagyan man ang layi agud nga matudluan ang mga estudyante sa dalagan sang ekonomiya kag pang-gobyerno sang pungsod.
Satisfied naman si Defensor sa nangin relasyon nila sang Department of Education bangud paagi man sa ahensya, may varsity program ang probinsya, rason man nga nagapangibabaw ang mga atleta nga Ilonggo sa Palarong Pambansa.
Plano naman sang natungdan nga uboson ang tanan nga ikasarang agud nga madugangan ang budget para sa dugang nga classrooms sa Iloilo.
