ILOILO CITY– Ginpasalamatan ni Iloilo Governor Arthur Defensor Jr. ang tanan nga mga amay sa probinsya sang Iloilo kadungan sang pagsaulog sang Fathers Day subong nga adlaw.
Sa Good Morning Philippines Program sang Bombo Radyo, ginpahayag ni Governor Defensor nga tuman siya nga nagapasalamat sa tanan nga mga amay sang probinsya, bangud dako ang papel nga gintungdan sang mga ini sa pag-atubang sang krisis nga dulot sang Coronavirus Disease 2019 pandemic.
Suno kay Defensor, ang tanan nga kadalag-an sang probinsya sa pag-atubang sang problema sa pandemya ang tungod man sa kabakod sang paghugpong sang tagsa ka mga pamilya sa probinsya.
Ang pamilya suno sa iya ang makabig nga basic nga unit ang sosyudad kag bangud sa kabakod kag kaisog sang tagsa ka amay, indi ini gilayun mapukan.
Dugang pa sang gobernador, padayun siya nga nagapangayo sang suporta sang tagsa ka mga amay sa probinsya,agud mas maprotektahan ang tagsa ka miyembro sang pamilya kag mas mapahugot pa ang pangkontra sa COVID-19.
