Ginpasidunggan sang 6th Regional Community Defense Group (6RCDG) sang Reserve Command, Philippine Army si Iloilo Governor Arthur R. Defensor Jr., upod ang pila ka mga opisyal sang probinsya paagi sa paghatag sang military serial numbers kag mga certificates sa ginpatigayon nga flag-raising ceremony kaina sang aga, Abril 27, 2026.
Ginhiwat ang aktibidad sa Iloilo Provincial Capitol bilang kabahin sang padayon nga pagpabaskog sang kooperasyon sa tunga sang Probinsya sang Iloilo kag sang Armed Forces of the Philippines (AFP).
Sa interview sang Bombo Radyo kay Col. Michael Asuncion, Director sang 604th Community Defense Center, iya ginpahayag nga isa ini ka maayo nga kolaborasyon sa Gobernador bangud mapasangkad sini ang mga aktibidades nga ila patigayunon.
Ginpahayag man sini nga si Gov. Defensor kag iban pa nga mga kaupod sini ang nag-agi man sa military orientation kag structural training paagi sa virtual teleconference, kag nagareport man sila personal kon may mga praktikal nga aktibidad.
Nahibaluan nga ang paghatag sang military serial numbers isa ka importante nga tikang sa pormalisasyon sang Reserve Force kag paagi sini, mahimo nga mangin citizen-soldiers ang mga civilians nga handa magbulig sa Philippine Army sa tion sang emerhensya, kalamidad, kag mga programa para sa pagpa-uswag sang komunidad.
