Nagpasalamat si Governor Samuel Gumarin kay Presidente Rodrigo Duterte apisar wala madayon ang iya pagbisita sa probinsya sang Guimaras.
Sa interview sang Bombo Radyo kay Gumarin, iya ginpahayag nga nahangpan niya kun nga-a wala nagdayon sa pagtabok sa Guimaras ang presidente.
Suno kay Gumarin, nagapasalamat sa gihapon ang pamilya sang mga biktima sang trahedya bangud nagpadulong si Department of Transportation Secretary Arthur Tugade nga amo ang nagpalab-ot sang mensahe ni Duterte kag nagpalab-ot sang bulig pinansyal.
Ginpahayag ni Gumarin nga nagpakigsapol siya kay Tugade agud istoryahan ang tuhoy sa pagatukuron nga Iloilo-Guimaras bridge.
Dugang sang natungdan, wala siya nagapamatok sa plano nga pagdula sang mga pumpboat nga may ruta Iloilo-Guimaras vice versa.
Naghatag man sang suhestyon ang gobernador nga kun tani may yara sang patigayunon nga drills para sa mga rescuers ilabi na sa mga pasahero agud nga indi na matabo ang trahedya sa diin 31 ang patay.
Nagalaum man ang gobernador nga malumpuwasan sang probinsya sang Guimaras ang ginapangatubang nga kasubo.
Bilang bulig sa mga pasahero nga naapektuhan sang trahedya, naghatag na sang kapin sa P2 million ang provincial government.
