Ginmanduan ni President Ferdinand ”Bongbong” Marcos Jr. ang tanan nga government agencies nga dapat naka-high alert sa tunga sang paglaslas ni Bagyo Marce sa pila ka parte sang Pilipinas ilabi na sa Luzon.
Ginpahayag ni Marcos nga dapat makalab-ot gid insigida sa mga komunidad ang kinahanglanon nga mga impormasyon kag dapat husto man ang ma-report nga on-the-ground situations.
Sa iya press statement, ginsugo man sini ang concerned agencies nga dapat bantayan ang mga dam kag sundon ang existing protocols kun san-o maga-release sang tubig.
Dugang diri, nagmandu man si Marcos nga ihanda na para sa deployment ang mga rescue equipment.
”Ikasa na rin ang lahat ng rescue equipment, sa lahat ng antas ng pamahalaan, sa lahat ng ahensya na maaaring mag-ambag ng mga kagamitan, lalo na mga sasakyan,” dugang sini.
Ginapa-standby man ang Department of Public Works and Highways kag ang Department of Transportation para sa posible himuon nga road clearing operations.
Sa 8:00 pm bulletin sang DOST-PAGASA, ulihi nakit-an ang sentro sang bagyo sa 260 km nasidlangan sang Aparri, Cagayan. Nagahulag ini sang mahinay sa direksyon panaaminhan-nakatundan.
Napaidalom naman sa tropical cyclone wind signals 1,2, kag 3 ang pila ka bahin sang Luzon.
