ILOILO – Tuman ang kalipay nga nabatyagan sang mga government employees sa paghatag sang tion sa ila agud nga makaupod ang ila tagsa ka mga pamilya kadungan sang 27th National Family Week.
Sa interview sang Bombo Radyo kay Joy Marmol, Admin Aid 3 kag Clerk 1 sang Iloilo Provincial Veterinary Office, iya ginpahayag nga labing una nga kahigayunan nga nakaupod niya sang tingob ang iya mga anak kag apo bangud may mga kaugalingon na ang mga ini sang pamilya.
Suno kay Marmol, apisar nga tunga lamang sa adlaw ang ginhatag sa ila, nagserbe naman ini nga dako nga kahigayunan agud nga makaupod nila sa pag-kaon ang ila pamilya kag maka-istoryahanay naman sa liwat.
Samtang nagpauli gid halin sa Iloilo Provincial Capitol padulong sa San Joaquin, Iloilo si Raymond Sibongga, ang board secretary ni Board Member Marcelo Valentin Serag agud nga makaupod ang iya pamilya.
Suno kay Sibongga, nakibot lamang ang iya iloy kag amay nga nakapauli siya apisar wala man sang birthday.
Pahayag pa niya, indi kinahanglan nga may birthday agud nga makaupod ang pamilya bangud sa simple nga pag-upod sa pagkaon ang tuman na ka importante para sa iya.
Madugay naman nga tinion nga wala nakaupod ni Sibongga ang iya amay kag iloy sa pagkaon gani iya na desisyonan nga mag-ihaw sang manok kag nagluto ini sang adobo.
Nagalaom ang mga empleyado sang gobyerno nga tagsa ka tuig, hatagan sila liwat sang kahigayunan nga makaupod ang ila pamilya sa pihak sang masako nila nga trabaho.
