Uso subong ang pakulintas sang kuwarta sa tion sang graduation bangud nauyunan gid sang mga estudyante kun hatagan sila sang amo sini nga regalo.
Apang wala na siguro sang makapyerde sang nabaton sang isa ka Grade 10 student nga si Charles Joseph “CJ” Baybay.
Ini bangud wala duha-duha ang iya utod nga lalaki sa paghatag sa iya sang isa ka milyon nga pesos sa iya nga espesyal nga adlaw sa eskwelahan.
Suno kay CJ, naga-expect gid man siya nga may ihatag nga regalo ang iya magulang nga si Christian Merck Grey bangud sa iya mga nalab-ot sa eskwelahan, apang wala sya naghaum nga lunsay ini P1,000 bills nga naglab-ot pa sa P1-million.
Magluwas diri, nakabaton pa si CJ sang gold necklace!
Nahibaluan man nga indi gid close sang una ang sanday CJ kag Christian bangud half brothers lamang sila kag indi updanay sa pagdaku, apang nag-umpisa nga nangin suod sang ulihi sang natun-an na nga magsalig sa isa kag isa.
Ginpahayag pa sang magulang nga deserving ang iya manghod sa amo kadaku nga regalo bangud maalam ini, mapisan, kag mabuot nga bata.
Gintugyan naman ni CJ ang kuwarta sa iya nga iloy agud gamiton sa pagtukod sang negosyo, kag agud nga matago para sa ila galamiton sa palaabuton. #
