(Update) ILOILO CITY – Duha ka beses na nga ginhimuslan ang Grade 4 pupil nga biktima sang gang-rape sang apat sini ka mga schoolmates nga menor-de-edad sa banwa sang Ajuy, Iloilo.
Sa interview sang Bombo Radyo Iloilo, ginpahayag ni Police Chief Inspector Charlie Sustento, hepe sang Ajuy Municipal Police Station, antes pa man sang gang rape sang Marso 6, una na nga ginhimuslan ang biktima sang 14-anyos nga suspek.
Pahayag pa sang Ajuy PNP chief, wala nagpamatok ang biktima sang gin-uyatan ang kamot kag tiil sini sang ini ang ginhimuslan sang apat ka mga suspetsado, kag magkaupod man ang mga ini nga nagpanaog gikan sa bukid kun sa diin natabo ang insidente.
Magluwas sa mga suspetsado, kaupod man ang biktima sa paglantaw sang pornographic videos antes matabo ang insidente, kag posible suno sa mga otoridad nga ginsunod sang mga suspek kag biktima ang ila nakit-an sa video.
Dugang pa ni Sustento, mahimo nga wala nagiyahan sang maayo sang iya adopted parents ang biktima, gani madasig ini magpati sa kun ano ang ipahimo sa iya apesar nga makapalain sa iya.
Samtang, wala sang mahimo pasakaan sang kaso batok sa apat ka Grade 5 pupils nga suspek sa paghimulos sa biktima.
Suno kay Sustento, matapos ang tul-id nga imbestigasyon, nagagwa nga ang mga suspetsado ang naga-edad sang 11, 12-anyos kag duha ka 14-anyos.
Nagpanugyan man ini nga kun tani i-block ang mga pronographic sites agud indi maimpluwensyahan ang mga menor-de-edad, sa diin dako ang posibilidad nga sa internet nakuha sang mga bata ang ginlantaw nga porn videos.