Grade 4 pupil nga biktima sang gang rape, nag-untat na sa pag-eskwela bangud sa kahadlok

ILOILO CITY – Nag-untat na sa pag-eskwela ang Grade 4 pupil nga biktima sang gang rape sa Ajuy, Iloilo.
Sa interview sang Bombo Radyo Iloilo sa tiya sang biktima, ginpahayag sini nga wala na sang gana nga magbalik sa eskwelahan ang iya hinablos nga si alyas Jasmine, bangud sa kahadlok nga liwat ini himuslan.
Apang gin-ako sang tiya sang biktima nga may mga kahigayunan nga nagaligoy sa klase ang iya hinablos.
Nahibaluan nga apat ka mga schoolmates ni Jasmin nga naga-edad 10 tubtob 14-anyos ang bulos-bulos nga naghimulos sa biktima sang nakaligad nga semana.
Eksklusibo nga ginsaysay sang mga suspek nga sanday alyas Lando kag alyas Janjan sa Bombo Radyo Iloilo nga ila ginhimuslan si Jasmin kabaylo sang paghatag sang stickers sa biktima nga ginakahiligan sini nga hampangan.