ILOILO – Satisfactory ang ginhatag nga grado sang Department of Interior and Local Government sa ginpatigayon nga clearing operations sa Western Visayas.
Sa interview sang Bombo Radyo kay Engr. Ariel Iglesia, Regional Director sang Department of Interior and Local Government 6, iya ginpahayag nga sa pangkabug-usan, pasado ang grado sang Western Visayas kun road clearing operations ang pagahambalan.
Suno kay Iglesia, indi lang siya makahatag sang specific grade sa Oplan Hawan sa diin napasa na nila sa central office ang report.
Ginpahayag ni Iglesia nga santo sa validation, husto ang report nga ginpasa sang tagsa ka Local Government Unit.
Sa pihak sini, ginpahayag sang natungdan nga indi man mahinago nga may yara sa gihapon sang obstruction nga wala pa nakuha ukon nagbalik sa kinaandan nga lugar matapos ang plaso nga ginhatag ni Presidente Rodrigo Duterte.
Magapadayon naman suno kay Iglesia ang pagpatigayon sang clearing operations agud nga mangin maligwa ang mga dalanon sa bug-os nga pungsod.
