ILOILO CITY – Ginabanta nga magalab-ot sa isa ka libo nga local kag international cycling enthusiast ang magapakigbahin sa labing una nga Gran Fondo New York Asian Championship nga patigayunon sa Iloilo.
Sa interview sang Bombo Radyo kay Arch. Wilfredo Sy, race director sang Gran Fondo New York Asian Championship sa Iloilo, iya ginpahayag nga ang nasambit nga aktibidad ang patigayunon sa Setyembre 22 sa diin sa Setyembre 21 ang deadline sang registration.
Suno kay Sy, may yara sang duha ka category nga ginalakipan sang competitive long-distance course nga naga-cover sang 133 kilometer kag 650 meter climbing samtang ang non-competitive middle-distance course naman ang naga-cover sang 64 kilometer kag 220 meter climbing.
Ginpahayag ni Sy nga maga-umpisa ang kompetisyon sa Iloilo Business Park sa Mandurriao, Iloilo City kag maga-agi sa mga kabanwahanan sa 2nd, 3rd kag 4th district sa probinsya sang Iloilo pabalik sa point of origin.
Bangud sini, ginpahayag ni Sy nga ginahitso pa ang road closure nga patigayunon agud nga hatagan sang ligwa ang nasambit nga kompetisyon.
Ang overall male kag female winners sa competitive long distance ang pagahatagan sang libre nga flight, hotel accommodation kag entry sa Gran Fondo New York Qualifier Corral lakip na sa Gran Fondo New York World Championship nga patigayunon sa Mayo 17, 2020.
Ang 20% finishers sa tagsa ka age group ang pagahatagan sang kahigayunan nga magapakigbahin sa Qualifier Corral kag sa 2020 Campagnolo GFNY World Championship.
Ang Gran Fondo New York ang isa ka global cycling marathon brand nga ginapatigayon sa Estados Unidos, Argentina, Indonesia, Brazil, Chile, Colombia, Costa Rica, Ecuador, Italy, Israel, Mexico, Panama, Pilipinas, Portugal, Dominican Republic kag Uruguay.
