Nakit-an ang isa ka fragmentation hand grenade nga naputos sa tela sa likod nga porsyon sang comfort room sa Alimodian Public Plaza.
Sa interview sang Bombo Radyo kay Police Captain Marion Asparo, hepe sang Alimodian Municipal Police Station, iya ginpahayag nga may isa ka lalaki nga nangihi sa nasambit nga lugar sang natalupangdan sini ang ginapatihan granada.
Suno kay Asparo, gilayon nga nagpangayo sang bulig ang lalaki sa mga kapulisan nga nagapatrolya sa area kag nagtawag man gilayon ang mga ini sa Provincial Explosive Ordnance Disposal and Canine Unit (PECU).
Dugang pa sang natungdan, posible nga nangihi man ang tag-iya kag nabilin lang ang nasambit nga granada bangud may pin pa ini.
Yara na subong ang Belgian type live grenade sa paghinakop sang Explosive Ordnance Disposal (EOD) para sa nagakaigu nga disposisyon.
Nagpa-install naman sang bag-o nga closed circuit television (CCTV) sa area para sa dugang nga seguridad.#
(ARTICLE: Bombo Marie Sol Biñas)
