ILOILO CITY – Nabaton na sang mga grand draw winners sang Buena Mano Salvo Year 13 Promo sang Bombo Radyo kag Star FM ang ila premyo.
Gamiton ni Ramil Canillo sang Aduana Arsenal, Iloilo City sa pagpa-eskwela sa iya kabataan kag padal-an man ang iya iloy sa Negros sang nadag-an sini nga P10,000.
Una nga bes pa lang ini ni Canillo nga magdaug sa promos sang Bombo Radyo.
Emosyunal naman nga nagpasalamat sa Ginoo kag sa Bombo Radyo Philippines si Ruby Mamalampac sang Bundulan, San Dionisio, Iloilo sa iya nadag-an nga P15,000.
May ibakal na siya sang steamer suno kay Mamalampac, para sa iya negosyo nga pagluto sang puto kag kutsinta.
Sa iya gamay nga negosyo, nagalaum si Mamalampac nga makasupot agud makapakay-o sang iya balay.
Dugang man nga capital sa iya negosyo nga peanut butter ang nadag-an ni Rhea Debil sang Sapao, Dumangas, Iloilo, nga P5,000.
Wala tupong nga kalipay naman ang nabatyagan sang grand draw winner nga si Mary Grace Gumban sang La Paz, Iloilo City.
Si Gumban ang nagdaug sang P1 million sa Buena Mano Salvo Year 13 Promo sang Bombo Radyo kag Star FM.
Iya ipakay-o sang ila puluy-an kag ibayad sang mga kautangan, ang nadag-an sini nga premyo.
Gin-agda man ni Gumban ang mga tagpalamati sang Bombo Radyo nga magpasakop man sa mga promos sang Bombo Radyo.