Malipayon nga ginpahibalo sang celebrity host nga si Robi Domingo nga nagabusong na ang iya asawa nga si Maiqui Pineda.
Ginhimo sang mag-asawa ang announcement kadungan sang ila ikaduha nga wedding anniversary. Gintawag nila ang ila baby nga “greatest blessing” nga magaabot sa ila.
“Two years married… and now our greatest blessing is on the way. Happy 2nd anniversary! We’re ready to give you all our love,” caption ni Robi sa video nga iya gin-post.
Nalakip sa video ang footage sang Septyembre sa pregnancy test ni Maiqui, ang ila reaksyon sang nakumpirma nga nagabusong ini, tubtub nga ginpahibalo na nila ang maayong balita sa ila suod nga mga abyan sa showbiz lakip kanday Darren Espanto, Donny Pangilinan, Vice Ganda, Anne Curtis, Coco Martin, Kathryn Bernardo, kag iban pa.
Nag-umpisa sa pag-date sanday Robi kag Maiqui sang 2018 kag na-engage sang Nobyembre 2022.
Sang 2023, na-diagnose si Maiqui nga may dermatomyositis nga isa ka rare autoimmune disease nga rason sang muscle weakness, inflammation, kag skin rashes.
Apisar sang diagnosis, ginpadayon ang ila kasal sang January 6, 2024 sa isa ka matahum nga seremonya sa Bulacan. Sang amo man nga tuig, nag-improve ang kondisyon ni Maiqui kasunod sang pagpaidalom sini sa intensive treatment.
