ILOILO – Kadungan sang selebrasyon sang Earth Day subong nga adlaw, nakalinya man ang aktibidad nga patigayunon sang Green Forum Western Visayas.
Ini amo ang paghiwat sang conference natuhoy sa restoration sang wetland sa Negros Occidental, pagpreparar sang Iloilo Water Resilience Initiative Project, kag pagprotehir sang lumba-lumba ukon mga dolphins.
Sa interview sang Bombo Radyo kay Engineer Melvin Purzuelo, Project Coordinator sang Green Forum Western Visayas, iya ginpahayag nga nakatutok ini sa pagpasanyog sang water availability sa Western Visayas pinaagi sa Iloilo Water Resilience Initiative Project nga nahamtang sa Tigum-Aganan kag Iloilo-Batiano Watersheds.
Suno kay Purzuelo, agud mangin epektibo ang kawsa sang grupo, nagahiwat ang mga ini sang conference agud mapalapnag ang importansya sang pagkinot ukon pag-conserve sang tubig.
Ginpahayag dugang sang natungdan nga kabahin man sang kawsa sang grupo amo ang ang pagprotehir sang mga lumba-lumba ukon dolphins malapit sa mga development projects.
Samtang, nalakip man sa aktibidad sang Green Forum Western Visayas ang patigayunon nga Earth Day Job Fair sa palaabuton nga Abril 29 sa Bantayan Park sa Bago City, Negros Occidental.
