Daw ano ikaw ka arte pag-abot sa luyag mo nga pagkaon?
Sa India, nangin rason ini kun ngaa wala nadayon ang kasal sang magkahagugma.
Ang groom amo si Ramakant Patra, 27, gwapo kag ang importante, palangga gid niya ang iya nobya!Nagbyahe si Patra upod ang iya pamilya halin sa Keonjhar, India para sa seremonya sang iya kasal sa iya nobya sa Bandhagaon village sa Sukinda.
Sang nag-abot sanday Patra, syempre gin-welcome sila sang pamilya sang bride kag nagpasakop pa gani siya sa mga ritwal.
Sang ulihi sang yara na sa dining hall, ginpangita na sang miyembro sang wedding party ang mutton curry — ang manamit nga dish nga may karne sang kanding kag may vegetables.Bangud wala nakahanda ang pamilya sang bride sang mutton curry para sa wedding feast, ginapahayag nagbinaisay ang duha ka pamilya tubtob nga naling-an si Patra kag ginkanselar na lang ang kasal.
Nagbiya si Patra kag ang iya pamilya kag nagtinir sa ila paryente sa Kuhika village. Sang ulihi, nagpakasal si Patra kag ang isa pa ka babayi sa Phulajhara antes ini liwat nagbalik sa ila nga balay sa Keonjhar.
Indi ini ang una nga tion nga may indi ordinaryo nga istorya sang kasal sa India. Sang nagligad lang nga bulan, sa Uttar Pradesh, India, ginkanselar man sang bride ang iya kasal matapos wala nakasabat ang iya groom sang quick math test.
