Ginhangkat sang grupo nga Bayan Panay ang mga local nga opisyal sang siyudad sang Iloilo nga mag-commute.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga dapat mabatyagan man sang mga opisyal ang kabudlay sang mga commuters nga naga-antos sa kakulang sang Public Utility Vehicle (PUV), overloaded nga mga modernized jeepney, kag magutok nga dalan sa siyudad.
Ginpaathag ni Forro nga dugay na ini nga problema sang siyudad, apang hasta subong, wala gihapon ini nasolusyunan.
Nagpanawagan man ang grupo sa publiko nga mag-upod sa ila kampanya kontra kurapsyon kag ipangabay sa lokal nga gobyerno ang nagakaangay nga solusyon sa problema sa transportasyon.
Ginhatagan man nila importansya ang accountability sang mga opisyal sang gobyerno sang Pilipinas nga ginakabig nga kurap.
