ILOILO CITY- Nagpangabay sa gobyerno ang grupo sang mga mangunguma sa Iloilo nga bag-uhon ang perspektibo kun produksyon sang produkto nga pang-agrikultura sa pungsod ang istoryahan.
Sa interview sang Bombo Radyo kay Lucia Capaducio, chairperson sang Paghugpong sang Mangunguma sa Panay kag Guimaras ukon PAMANGGAS, iya ginpahayag nga subong, ang ginahimo sang gobyerno amo nga mag-import gilayon kun kulang ang
suplay sang isa ka partikular nga produkto kaangay sang bombay, bugas ukon kalamay kag iban pa.
Suno kay Capaducio, kuntani tutukan sang gobyerno ang pagpadamo sang produksyon sang sini nga mga basic nga commodities agud nga mapun-an ang kinahanglanon ukon demand sang mga pumuluyo kag tinguhaan nga maka-produce sang surplus agud nga kita ang mag-export sang sini nga mga produkto.
Dismayado naman ini sa pinakaulihi nga tikang sang gobyerno nga pag-import sang bombay bangud nga nagtuon gid ini sa harvest season gani ginapanan-aw nga magsarurot ang presyo sini, nga makabig nga disbentaha naman para sa mga lokal nga mangunguma.
