Nagahingyo ang grupo sang exporters sang mas mabaskog nga suporta gikan sa gobyerno para nga mapadala ang mga produkto sang Pilipinas sa luwas sang pungsod.
Ginpahayag ini ni Philippine Exporters Confederation Inc. (Philexport) president Sergio Ortiz-Luis Jr. bangud sa kahangawa nga indi malab-ot sang export performance ang ila nga target subong nga tuig.
Suno kay Ortiz-Luiz, ang $110-billion projection ang mas manubo sa export target nga $113.42 billion sa idalom sang Philippine Development Plan kag sa $163.6-billion nga target sa idalom naman sang Philippine Export Development Plan para sa 2025.
Magluwas na kulang ang budget para sa export ilabi na sa promotion, may mga domestic and external risks man sila nga ginapangatubang suno sa natungdan lakip na ang malain nga tyempo, ang mga kalamidad, ang acute and protracted global economic slowdown sa major economies, ang nagapadayon nga geopolitical tensions and conflicts, trade wars kag protectionist trade policies ilabi na sa Estados Unidos.
Nagalaum ang natungdan nga matigayon ang mga free trade agreements (FTA) kaupod sa iban nga pungsod subong nga tuig agud nga mas mapaayo kuntani ang ila performance sa pag-export sang goods, services kag investments.
