Preparado na ang grupo sang Makabayan Bloc nga mag-upod sa hublag-protesta bwas nga adlaw, Nobyembre 30, sa Luneta Park.
Sa interview sang Bombo Radyo kay Antonio Tinio, ACT Teachers Party-list Representative, iya ginpahayag nga bitbit sang ila grupo ang mabaskog nga panawagan nga tanan nga may kahilabtanan sa korapsyon dapat manabat.
Suno sa iya, nagalaum sila nga pamatian na ang ila tingog agud mahatagan sang hustisya ang mga Pilipino nga ginkawatan pinaagi sa nagkalain-laing proyekto nga ginpatuman sa pungsod.
Dugang pa ni Tinio nga paagi sa sini nga hublag-protesta mapangalanan na ang tanan nga may kahilabtanan sa korapsyon ilabi na halin sa matag-an nga pwesto.
Lakip man sa panawagan sang nasambit nga grupo amo nga gilayon na nga pasakaan sang kaso ang tanan nga mga korap nga opisyal kag mabalik na ang mga ginkawat nga kwarta.
Gindayaw ni Antonio Tinio ang tikang ni former DPWH District Engineer Henry Alcantara sa pagbalik sang P110 million nga kwarta sa Department of Justice.
Suno kay Tinio, kabahin ini sang ginpromisa nga restitution ni Alcantara.
Apang ginpunto niya nga gamay pa lamang ini nga kantidad ang nabalik, kag nagapati ini nga dako pa gid ang kantidad nga nakawat sang nasambit nga opisyal sa gobyerno.
Dugang pa niya, dapat ma-recover sang gobyerno ang kabug-usan nga kwarta nga ginkawat sang mga korap nga opisyal.
Nagapati man si Tinio nga may yara pa sang mga dalagkuan nga opisyal sang gobyerno nga nangin kabahin sang korapsyon sa pungsod.
Nagapanawagan man siya kay anay Ako Bicol Rep. Zaldy Co nga magpauli sa pungsod kag pamatud-an ang tanan nga ginbuyagyag sini sa publiko, agud mahatagan na sang sabat ang tanan nga nagapangayo sang hustisya sa lapnagon nga korapsyon.
