ILOILO – Ginapanawagan sang grupo sang mga health care workers ang pag-release sang ila One COVID-19 Allowance nga wala pa nahatag matapos ang duha ka tuig.
Nahibaluan nga nakasaad sa Special Provisions No. 14 sang Department of Health budget para sa Fiscal Year 2022 General Appropriations Act, ang pag-allocate sang P7.919 billion para sa mga public kag private healthcare workers kag non healthcare workers nga nalakip sa coronavirus disease 2019 response.
Ang rate sang allowance ang nakabase sa risk exposure sang mga mamumugon kun sa diin makakuha ang mga ini sang P9,000 para sa high risk; P 6,000 ang moderate; kag P 3,000 ang low risk.
Sa interview sang Bombo Radyo kay Jay, isa sa mga vaccinators sa Probinsya sang Iloilo, iya ginpahayag nga wala pa na-expedite sang Department of Health ang ila allowance sa bulan sang Mayo kag Hunyo para sa tuig 2021.
Suno kay Jay, ginahulat na lang sang mga ini ang pondo nagikan sa central office nga itugyan sa probinsya nga pirmado naman nanday Regional Director Dr. Adriano Subaan kag Iloilo Governor Arthur Defensor Jr.
Ginpahayag dugang sang natungdan nga tuman ka naperwisyo ang masobra 1,000 ka mga healthcare workers nga diri nagasalig sang galastuhon.
Sa subong, nagahulat na lang ang mga ini sang lihuk sang Department of Health nga mahatagan sang nagakaigo nga benefits.
