Nangin indi kinaandan ang hulag sang grupo sang mga karnero matapos ginpangharab ang ginabanta 100-kilos sang cannabis sa isa ka uma sa Thessaly, Greece.
Bangud sang heatwave, wildfire, kag lapnagon nga pagbaha nga sunod-sunod nga natabo sa Greece subong nga mga binulan, apektado katama ang mga kaumhan kag halos na makakita ang mga sapat sang maayo nga mga hilamon nga ila makaon.
Halimbawa diri amo ang grupo sang mga karnero nga nakatultol sa isa ka nabaw-ing nga lugar kun sa diin ginapatubo ang mga marijuana.
Photo Courtesy: AP
Suno sa tag-iya sang amo nga duta, ang amo nga pananum ang nahalitan na sang bag-o lang naglaslas nga Bagyo Daniel, kag ang mga karnero ang nagbulos kag nag-ubos sa pagharab sa nabilin nga tanum.
Ginpahayag pa sang tag-iya nga indi siya makahibalo kun mahibi ukon makadlaw sang nakit-an ang amo nga hitabo bangud una, nabatyagan sini ang heatwave kag nanaog ang produksyon; nagsunod ang bagyo kag baha kun sa diin halos nag-anaw man sa lugar kag naubos man ang ila propiedad; kag subong, nakit-an niya ang mga sapat nga sa sobra ka gutom, nagmantinir sang marijuana.
Base sa reports, nakit-an sang nagabantay nga lain na ang hulag sang mga karnero kag halos taas pa sa kanding ang sarang sini malumpat.
Nahibaluan nga legal ang marijuana sa Greece para sa pagpamulong halin pa sang 2017.
Sini lang nga 2023 sang gin-inagurahan sang amo nga pungsod ang labing-una sini nga medicinal cannabis production plant nga nagbulig man sang daku sa ekonomiya sang Greece.#
